Vision di Jump18 pa elimina incidencia di obesidad infantil na Aruba
Jump18 ta un programa di prevencion di obesidad pa mucha y hoben lansa den luna di october. E programa ta consisti di un ekipo di hobennan profesional di salud na Aruba y un pediatra cu a desaroya un iniciativa pa capacita e muchanan y nan mayornan pa mehora nan salud y bienestar.
E filosofia di Jump18 ta motiva y permiti cu e muchanan di Aruba y nan mayornan por biba un estilo di bida sostenibel y saludabel necesario pa preveni e efectonan dañino di obesidad infantil.
Amy van der Linden, encarga cu e business plan y process development, ta conta cu e programa ta bayendo hopi bon. E programa tin 18 participante actualmente entre 4 aña y 18 aña di edad. El a splica cu e participantenan tin sesionnan di ehercicio tres biaha pa siman y esey ta tuma luga mas tanto na lugarnan publico y riba diabierna nan ta haci nan ehercicionan na lama.
“Nos ta echt enfoca ariba usa espacionan publico, pa despues di e programa nan por sigui bay eynan y sigui cu nan mesun ehercicio. Pasobra esey ta e meta di nos, cu nan por sigui cu ehercicio y nan estilo di bida saludabel despues cu e programa caba”, Srta. Van der Linden a bisa.
El a splica tambe cu cada dos siman e mucha y hobennan tin tayernan interactivo cu ta siña nan tocante cuminda saludabel y nan ta siña aplica e habilidadnan cu nan ta siña durante e consultanan. Un diasabra pa luna e participantenan tin “carousel consultations” unda cu nan ta wak un dietista, un case manager y e pediatra y nan ta ricibi tips y e dietista, case manager y pediatra ta check kico e muchanan mester y ta guia nan con pa haci e cambionan den nan estilo di bida.
E programa Jump18 ta dura seis luna y cada tres luna nan tin midimento, unda cu e ekipo ta check e progreso di e participantenan. “Nos ta haci un fitness test, dus esey tambe parti dje y nos ta echt check kico a cambia y tambe nos ta puntra pa feedback. E programa ta dura seis luna pero nos meta ta cu despues di e seis luna nan por sigui nan mes cu e hermentnan cu nan a siña durante e programa”, van der Linden a splica.
El a subraya cu e ekipo di Jump18 kier haci e programa aki un proyecto a largo plaso y e prome grupo di participantenan aki ta parti di e proyecto piloto. “Nos kier sigui, nos kier laga esaki bira un proyecto a largo plaso. Y djis pa e piloto aworaki nos a dicidi di hacie asina pa check con e ta bay y kico nos por cambia pa haciele mas eficiente tambe. Pero otro aña sigur nos kier cuminsa atrobe y check si nos por expande pa yuda mas hende, pasobra nos meta ta pa haciele un proyecto a largo plaso”, el a agrega.
Srta. Van der Linden ta conta tambe cu nan ta ricibi hopi feedback positivo di parti di e participante- y mayornan. El a enfatisa cu nan enfoke ta pa haci e actividadnan y e ehercicionan leuk pa e muchanan y nan enfoke ta pa e muchanan y hobennan mehora riba nan mes y competi pa ta e miho.
“E feedback di e mayornan ta hopi positivo. Nan ta bisa cu e muchanan gusta bay y nan ta echt anticipa pa tur nos sesionnan, dus esey ta hopi leuk pa tende. Y nos ta tende tambe cu normalmente nan no tabata gusta bay sport pero aworaki si pasobra nos ta echt enfoca riba hacie leuk pa nan”, el a bisa.
Un di e participantenan, e hoben Farash van Kempen di 14 aña edad ta conta cu el a drenta e programa Jump18 door cu su juffrouw di baile a recomend’e pa inscribi, y tambe pasobra su mes tabata kier baha peso y e tabatin mester di ayudo pa esey.
“E cosnan mas dibertido ta e ehercicionan. Nan ta hopi fun y mi experiencia cu esey ta cu nos ta den grupo y nos tur ta haci weganan of haci workout, bo ta haya mas friends y esey ta hopi leuk. Tambe tin tayernan, awe tin uno di cushina. Tambe bo ta bay un biaha pa siman na pediatra pa pisa etc., esey tambe leuk. Mi experiencia ta bon, mi ta wak progreso den mi peso y mi ta hopi feliz cu esey”, Farash a bisa.
Jump18.org ta indica cu obesidad ta e problema di salud publico mas importante cu ta afecta mucha- y hobennan na Aruba. Na 2010 25.6% di e mucha muhe y 17.8% di mucha homber den edad di kleuter tabatin sobrepeso of obesidad. Entre e studiantenan di vijfde klas 43% di e mucha muhenan y 32.4% di e mucha hombernan tabatin sobrepeso of obesidad.
“E vision di Jump18 ta pa elimina e incidencia di obesidad infantil na Aruba y mehora e bienestar general di e muchanan di Aruba”.
