Prome edicion di JUMP18 un exito completo
Diabierna anochi a tuma luga e ceremonia di clausura di e prome edicion di e proyecto JUMP18. Un proyecto cu tin como meta e bienestar saludabel di e muchanan na Aruba, reduciendo e carga di enfermedadnan asocia cu obesidad infantil.
Durante e ceremonia di clausura Dr. Jamiu Busari, Project Leader y pediatra na Dr. Horacio Oduber Hospital, a splica cu e prome edicion di e proyecto JUMP18 tabata completamente exitoso y esaki a wordo determina pa cuater diferente factor.
E prome factor cu ta determina e exito di e proyecto aki ta educacion, Dr. Busari a indica. Cu esaki e kiermen cu tur e muchanan cu a participa mas nan mayornan a siña algo tocante un bida saludabel, habitonan di cuminda saludabel y tambe nan a siña tocante time management.
Segundo factor cu a yuda e ekipo di JUMP18 midi e exito di e prome edicion aki, segun Dr. Busari a sigui splica, ta cu tur e muchanan cu a participa a interactua y a crea un circulo social nobo y diferente. Muchanan cu bao di circunstancianan diferente no lo interactua cu otro personanan pa motibo di nan condicion, tabatin e oportunidad pa interactua cu otro muchanan den e proyecto aki.
Dr. Busari a sigui informa cu otro factor importante ta cu aworaki e mayornan tambe ta consciente di perspectivanan nobo con pa anima nan yiunan y con pa cambia y adapta nan habitonan na cas.
E ultimo factor cu a yuda converti e proyecto aki den un exito ta e peso di e muchanan. Dr. Busari a enfatisa cu pa nan e peso no tabata e factor mas importante, pero locual nan a descubri ta cu tur e muchanan cu a participa y a completa e programa no a subi di peso desde e comienso di e programa. Segun el a indica algun di nan a perde entre 5% y 10% di nan peso inicial, pero niun di e participantenan a subi di peso durante e seis lunanan di e programa.
“Nos enfoke no ta riba e peso, pero nos enfoke ta ariba tur loke tin alrededor di e mucha cu ta resulta den nan sufri di sobrepeso. Esey ta consisti di multiple factornan y esey ta locual nos por a ofrece”, Dr. Busari a agrega.
El a remarca tambe cu durante e programa nan por a yuda hopi mayor conecta cu diferente institucionnan medico cu bao di circunstancianan normal nan no lo por a logra. Cada mucha tabatin e oportunidad di tin seis consulta cu dokternan nutricionista, cu un biaha mas Dr. Busari a enfatisa, bao di circunstancianan normal no lo a pasa.
Mirando e exito rotundo di e prome edicion di JUMP18, durante e ceremonia di clausura e ekipo a anuncia oficialmente cu den luna di augustus un otro edicion di e proyecto lo cuminsa caminda un otro grupo di hoben lo tin e oportunidad di participa y completa e programa pa otro seis luna mas.
Minister di Salud Publico y Turismo, Dangui Oduber, tabata invitado di honor durante e ceremonia aki y durante su speech breve el a primeramente felicita tur e participantenan cu a completa e prome edicion di JUMP18 exitosamente. “Sigur pa mi ta un placer di ta ‘kinan awe nochi pa nos por reconoce cada un di boso nan”, el a bisa.
Minister Oduber a remarca cu como Ministerio di Salud nan ta apoya y sostene e bunita iniciativa aki di Dr. Busari cu e proyecto JUMP18. El a enfatisa cu prevencion ta algo cu su ministerio ta kere aden y pa e motibo aki mes nan a cuminsa traha riba Plan Nacional di Prevencion. El a menciona cu nan lo desea pa JUMP18 forma parti di e Plan Nacional di Prevencion, como tambe di Aruba Healthy Lifestyle Center cu, segun el a indica, lo wordo lansa dentro di e proximo simannan cu ta bira un centro pa yuda adultonan cu tin problema cu sobrepeso.
“E no ta facil pa tin e disciplina, tin e compromiso pa adapta y cambia bo lifestyle, hiba un bida mas saludabel, participa mas activamente na actividadnan fisico y sigur tur e mucha- y hobennan cu a completa e programa aki sigur ta un ehempel cu e ta posibel y cada un di boso nan ta un inspiracion pa tur esnan cu ta bay sigui den e programa aki”, el a agrega.
Por ultimo el a subraya cu como Ministerio di Salud nan lo sostene y apoya e proyecto cu nan siguiente edicion den luna di augustus pa sigui inclui mas mucha pa participa na programanan manera JUMP18.
